Thusawiin Chief Minister chuan, kan ram hian khawpui changkang leh tunlai, fel taka duan sa, kan mamawh ve tawh a. Thenzawl hi chutiang din nan chuan a rem hle, a ti a. Chief Minister chuan Prime Minister Narendra Modi hnena  a thu thlen dan sawiin, "Hei, Mizoramin remna kan nei ta a, India rama inremna hlawhtling ber zinga mi niin, state ralmuang ber kan lo ni ta a. Planned City kan nei bawk si lo va, mipui nuaih sawm chen theihna tur Peace City min pe rawh tiin ka dil ta a ni", a ti.

 He khawpui hi Aizawl sawn tumna a ni lo va, chutiang zawngin kan sawi ngai lo, Mizoramin khawpui mawi leh changkang tak kan neih ve theih nan khawpui thar din kan tum zawk a, Thenzawl tan bik pawh a ni lo va, Mizoram tan a ni, a ti.

Master Plan siamna chauh min la pe a, a taka hmalakna tur hi kan la ngaihtuah zel ang. 15th Finance Commission sum chuang bang, Prime Minister kuta awm mek chu dil kan rilruk mek, CM chuan a ti.

Khualzahawm B. Lalchhanzova, Supply Minister, Thenzawl khaw pa ni bawk pawhin thusawiin, Thenzawl hi hman atang tawhin khawpui a la nih tur thu mi tam takin an lo sawi tawh thin. Chu hun chu a takin a lo thleng dawn hnai ta a. Mipuite kan hlimin kan lawm hle. Thenzawl hi Bengkhuaia lal ram chhunga awm niin khawper a lo siam thinna a ni. Mary Winchester chung thua British sorkar aiawh TH Lewin nena Saui an tanna pawh tuna Thenzawl thlanmualah hian a ni, Peace City dinna hmun atan pawh a inhmeh hle a ni, a ti.

Sorkar thuchhuah tarlan danin, Peace City Master Plan siam hna hi chak taka bawhzui nghal a ni a. July ni 22 khan a siamtu tur zawnna hmahruai Request for Proposal for selection of Consultant tihchhuah niin company lian tak tak sawm leh pariatten an rawn ngaihven a. Ruahman anga thil a kal chuan tun thlaah hian a thawktu tur hi thlan fel hman beisei a ni, a ti.